“කර්මය” යන පදයේ මූලය ක්‍රියාව, චලනය හෝ විස්ථාපනය යන අර්ථය ඇති සංස්කෘත වචනයෙන් පැන නගියි. සෑම ක්‍රියාවකටම වර්තමානයේ පමණක් නොව ජීවිත කාලයෙන් ඔබ්බට ද ප්‍රතිවිපාක ඇති බව එයින් ගම්‍ය වේ. අධ්‍යාත්මික සන්දර්භයන් තුළ, කර්මය යනු පෙර ජීවිතවල හොඳ හෝ නරක ක්‍රියාවන්හි ඉතිරිව ඇති බලපෑම් ය.
ආයුර්වේදය – කර්මය සහ සෞඛ්‍යය
ආයුර්වේදයේ කර්මජ ව්‍යාධි – කර්මයෙන් උපන් රෝග යන සංකල්පය සර්ව කාලීනව ඉතා වැදගත් වේ. මේ යටතට ගැනෙන්නේ පැහැදිලි හෝ හඳුනාගත හැකි හේතුවක් නොමැතිව පැන නගින රෝග වේ.
ඒ අනුව කර්මජ ව්‍යාධි නිරූපණය වන අවස්ථා ලෙස
* පරම්පරාගත රෝග (ගැබ් ගැනීමේදී ප්‍රකාශ වන පරම්පරාගත රෝග සඳහා අතීත කර්ම දායක වන බව විශ්වාස කෙරේ)
* අහේතුකව හට ගන්නා රෝග (පැහැදිලි හේතුවක් නොමැතිව ඇති වන රෝගාබාධ තත්වයන් මෙයින් අදහස් වේ)
වර්තමානයේ සමහර තැනැත්තන්ට ඇති වන රෝග වල මූලයන් රසායනාගාර පරීක්ෂණ හා වෙනත් වෛද්‍ය විද්‍යාත්මක පරීක්ෂණ රාශියක් කළද අනාවරණය නොවේ. එවැනි තත්වයන් බොහෝ විට ඇති වන්නේ කර්මජ රෝග වශයෙනි.
කායික හා මානසික සෞඛ්‍යයට කර්මයේ බලපෑම
බොහෝ අධ්‍යාත්මික සම්ප්‍රදායන්හි මූලික සංකල්පයක් වන කර්මය යනු අප කරන ක්‍රියාවන් පමණක් නොව අප ලෝකයට මුදා හරින ශක්තිය ද වේ. හේතුව සහ බලපෑම පිළිබඳ මෙම විශ්වීය නීතිය අපගේ යහපැවැත්මට බෙහෙවින් බලපායි.
1. කර්මය සහ ශාරීරික සෞඛ්‍යය
යහපත් කර්මය: කරුණාව, ත්‍යාගශීලී බව සහ සිහිකල්පනාව යන ක්‍රියාවන් ශරීරය තුළ සැහැල්ලු බව ඇති කිරීම, ආතතිය අඩු කිරීම, ප්‍රතිශක්තිය වැඩි දියුණු කිරීම තුළින් ශාරීරික සෞඛ්‍යය ප්‍රවර්ධනය කරයි.
සෘණාත්මක කර්ම: කෝපය, ඊර්ෂ්‍යාව හෝ තණ්හාව මුල් කරගත් ක්‍රියාවන් ශරීරයේ සමතුලිතතාවයට බාධා කරයි, ආතතිය, හෝමෝන අසමතුලිතතාවය සහ නිදන්ගත සෞඛ්‍ය ගැටලු ඇති කරයි.
2. කර්මය සහ මානසික සෞඛ්‍යය
මනසේ සැහැල්ලු බව: යහපත් ක්‍රියාවන් මානසික නිරවුල්බව, අභ්‍යන්තර සාමය සහ සතුට පෝෂණය කරයි. එය මානසික වශයෙන් ඔරොත්තු දීමේ හැකියාව වැඩි කරයි.
චිත්තවේගීය කැළඹීම්: හානිකර ක්‍රියාවන් බොහෝ විට වරදකාරිත්වය, කාංසාව සහ නිෂේධාත්මක මානසිකත්වයට හේතු වන අතර එය මානසික යහපැවැත්මට බලපායි.
වඩා හොඳ සෞඛ්‍යයක් සඳහා කර්මය භාවිතා කරන්නේ කෙසේද?
* ස්වයං-ආවර්ජනය: ඔබ පිළිබඳවම වූ ධනාත්මක චේතනාවන් සමඟ ඔබේ සිතුවිලි සහ ක්‍රියාවන් නිතිපතා තක්සේරු කරන්න.
* දයානුකම්පාව සහ කරුණාව: අන් අය නඟා සිටුවීමට පමණක් නොව ඔබේ හදවතට සාමය ගෙන දෙන කරුණාවන්ත ක්‍රියාවන්හි නිරත වන්න.
* භාවනාව සහ යහපත් සිහිය: මෙම පුරුදු ඔබට හැඟීම් පාලනයට සහ ආතතිය අඩු කිරීමට උපකාරී වේ.
* සෞඛ්‍ය සම්පන්න පුරුදු: නිසි පෝෂණය, ව්‍යායාම සහ ආයුර්වේදීය දින චර්‍යාව ඇතුළු සමබර ජීවන රටාවක් යහපත් කර්ම චක්‍රය සම්පූර්ණ කරයි.
අධ්‍යාත්මික පිළිවෙත් තුළින් සුවපත් වීම
ආධ්‍යාත්මික ප්‍රතිකාර ක්‍රම මගින් කර්ම අසමතුලිතතාවයන් ආමන්ත්‍රණය කිරීමේ අතිවිශාල හැකියාවක් ඇත. භාවනා කිරීම, මන්ත්‍ර සජ්ඣායනා කිරීම සහ යාඥාවන් වැනි පිළිවෙත් දිව්‍යමය බලපෑමට හසුවන බව විශ්වාස කරන අතර සමහර අවස්ථාවලදී රෝග ක්ෂණිකව සුව කිරීමට උපකාරී වේ. මෙම ප්‍රතිකාර ක්‍රම ශරීරයේ සියුම් ශක්ති පද්ධති මත ක්‍රියා කරන අතර, සමබරතාවය සහ සාමකාමීබව යථා තත්ත්වයට පත් කිරීම අරමුණු කරයි.
කර්මය, සෞඛ්‍යය සහ අධ්‍යාත්මිකත්වය අතර සම්බන්ධය අවබෝධ කර ගැනීමෙන්, පරිපූර්ණ යහපැවැත්ම සහ අභ්‍යන්තර සාමය සාක්ෂාත් කර ගැනීමට කටයුතු කළ හැකිය. ඔබ සිහි තබා ගත යුත්තේ අප විසින් ලෝකයට දෙන දේ, අපට ආපසු ලැබෙනු ඇති බවයි. යහපත් චේතනාවන් සහ සවිඥානික ක්‍රියාවන් මුල් කරගත් ජීවිතයක් ගත කිරීමෙන්, අප විසින් යහපත් කර්මය රැස් කරනවා මෙන්ම ශාරීරික හා මානසික යහපැවැත්ම වැඩි දියුණු කර ගැනීමත් සිදුවේ.
වෛද්‍ය නර්මදා ජයසූරිය